ރަސްފަރި ފަރު އާރާސްތުކޮށް އަލުން އިޔާދަކުރުމުގެ މަޝްރޫޢުއަށް އެހީތެރިކަން ފޯރުކޮށްދިނުމަށް މާލެ ވޯޓަރ އެންޑް ސްވަރޭޖް ކަމްޕެނީ (އެމް.ޑަބްލިޔު.އެސް.ސީ) އާއި އެންވަޔަރަންމަންޓަލް ޕްރޮޓެކްޝަން އޭޖެންސީ (އީ.ޕީ.އޭ) އާއިއެކު ފަހުމުނާމާއެއްގައި ސޮއިކޮށްފިއެވެ. މި ފަހުމުނާމާގައި ސޮއިކޮށްފައިވަނީ، ރިސާރޗް އުޅަނދު، އާރު.ވީ ތިމާވެށީގައި މިއަދު ބޭއްވި ރަސްމިއްޔާތުގައި، އީ.ޕީ.އޭގެ ޑިރެކްޓަރ ޖެނެރަލް، އިބްރާހިމް ނަޢީމް އަދި އެމް.ޑަބްލިޔު.އެސް.ސީގެ މެނޭޖިންގ ޑިރެކްޓަރ، ޢަބްދުލް މަތީން މުޙައްމަދެއެވެ. މި ރަސްމިއްޔާތުގައި އީ.ޕީ.އޭ އަދި އެމް.ޑަބްލިޔު.އެސް.ސީގެ އިސްވެރިންނާއި މެނޭޖްމަންޓް ޓީމުން ބައިވެރިވެ ވަޑައިގަތެވެ.

މި ފަހުމުނާމާގެ މައިގަނޑު މަޤްޞަދަކީ އީ.ޕީ.އޭއިން އިސްނަގައިގެން ކުރިޔަށްގެންދާ ރަސްފަރީގެ ފަރުތަކާއި މުރަކަތައް އާރާސްތުކޮށް އަލުން އިޔާދަކުރުމުގެ މަޝްރޫޢުއަށް މިކުންފުނިން ފަންނީ އެހީތެރިކަން ފޯރުކޮށްދިނުމެވެ. މިގޮތުން، މި މަޝްރޫޢުގައި ބޭނުންކުރަމުންދާ އާރު.ވީ ތިމާވެށި އުޅަނދުގައި އެމް.ޑަބްލިޔު.އެސް.ސީއިން ފެން ޕްލާންޓެއް ބެހެއްޓުމާއި ސާރވޭ ކުރުމަށް ބޭނުންވާ ސާމާނު ހޯދައިދިނުން ހިމެނެއެވެ. އަދި މި ކުންފުނީގެ ޢިޖުތިމާއީ ޒިންމާގެ ދަށުން މި މަޝްރޫޢުއަށް ބޭނުންވާ ފެން ފޯރުކޮށްދިނުމާއި ދަތުރުފަތުރުގެ އިންތިޒާމްތައް ހަމަޖައްސައިދިނުންވެސް ހިމެނެއެވެ.

ރަސްފަރި ފަރަކީ 1995 އިން ފެށިގެން ހިމާޔަތްކޮށްފައިވާ ފަރެކެވެ. އަދި މިއީ މާލެ އަތޮޅުގައި އޮންނަ ތިމާވެށީގެ ގޮތުން އެންމެ މުހިއްމު އެއް ސަރަހައްދުވެސްމެއެވެ. ނަމަވެސް 2021 ވަނަ އަހަރުގެ އޮގަސްޓު މަހު ރަސްފަރި ފަރަށް ބާޖެއް އަރައި، 2،800 އަކަ މީޓަރަށް ވުރެ ބޮޑު ފަރުގެ ސަރަހައްދެއް ވަނީ ހަލާކުވެފައެވެ. މި ފަހުމުނާމާއަކީ ދިވެހިރާއްޖޭގެ ކަނޑުގެ ވެށި ރައްކައުތެރިކުމުރުމަށް ސަރުކާރުން ކުރަމުންދާ މަސައްކަތަށް އެއްބާރުލުން ދިނުމުގެގޮތުން އެމް.ޑަބްލިޔު.އެސް.ސީއިން  އެޅި މުހިންމު ފިޔަވަޅެކެވެ.

އެމް.ޑަބްލިޔު.އެސް.ސީއަކީ ތިމާވެށި ހިމާޔަތްކޮށް އަދި ރައްކައުތެރިކުރުމަށް ކުރިޔަށްގެންދެވޭ މިފަދަ ހަރަކާތްތަކަށް އަބަދުވެސް އެއްބާރުލުންދޭ ކުންފުންޏެކެވެ.